Meri Khatir Mein Saqi Kab Tera Paimana Aata Hai

miri khatir men saaqi kab tira paimana aata hai

ki yaan har-dam khayal-e-nargis-e-mastana aata hai

thikane justuju-e-yar men kis kis ke chhute hain

ki bulbul baagh men aur bazm men parvana aata hai

shab-e-furqat utha kar fitna-e-mahshar se kahti hai

mujhe zulf-e-daraz-e-yar ka afsana aata hai

nikal kar aankh se ghaeb nahin hote hain ye aansu

isi paani se bharta umr ka paimana aata hai

ilahi log kyuun ho ho ke khush firdaus jaate hain

magar is baagh se aage koi virana aata hai

dil-e-zar aur shast-e-yar men ik raah hai makhfi

khata ho kar bhi sidha navak-e-janana aata hai

chala huun ghar se uth kar kaabe ki janib magar mujh ko

taraddud hai ki raste men mire mai-khana aata hai

mujhe gardish men paaya daur-e-charkh-e-barin kaahe

ki mere saath chakkar men mira kashana aata hai

ye raghbat hai use aghyar se jab sher kahta hai

to mazmun bhi khayal-e-yar men begana aata hai

tire kuche men ho jaata hai kya insan par jaadu

abhi hushiyar jaata hai abhi divana aata hai

gaya jo is kham-e-gesu men vaan ka ho raha ‘salik’

ye hairat hai salamat kyuun ki phir kar shana aata hai

Leave a Comment