milega is ka mujhe kya uTha ke laaya huun
purane vaqt ka sikka uTha ke laaya huun
tumhari tishnagi dekhi nahin ga.i mujh se
main apni ok men dariya uTha ke laaya huun
shab-e-siyah men kuchh to mujhe suhulat ho
kisi ki yaad ka taara uTha ke laaya huun
jo ho sake to zara muḳhtalif bana ab ke
main qasr-e-zat ka malba uTha ke laaya huun
ye pyaas ilm ki kuchh to bujha.iye sahab
baḌe jatan se main basta uTha ke laaya huun
havale dhuup ke jis ne mujhe kiya ik din
usi ke vaste saaya uTha ke laaya huun
tamam ashk sarabon men Dhal ga.e ‘arshad’
shikasta aankh men sahra uTha ke laaya huun
Leave a Reply