Fan

ek raqqasa thi kis kis se ishare karti

ankhen pathrai adaon men tavazun na raha

dagmagai to sab atraf se avaz aai

”fan ke is auj pe ik tere siva kaun gaya”

farsh-e-marmar pe giri gir ke uthi uth ke jhuki

khushk honton pe zaban pher ke paani manga

ok uthai to tamashai sambhal kar bole

raqs ka ye bhi ik andaz hai allah allah

haath phaile hi rahe sil gai honton se zaban

ek raqqas kisi samt se nagah badha!

parda sarka to maan fan ke pujari garje

”raqs kyuun khatm huaa? vaqt abhi baaqi tha”