Rishi Patialvi
ahl-e-ishq ki hasti kya ajiib hasti hai
marg-e-na-gahani ko zindagi tarasti hai
naam hai sukun jis ka jins vo nahin milti
ashk jis ka hasil hain vo ḳhushi to sasti hai
jis jagah mohabbat se husn-o-ishq milte hain
kaun si vo duniya hai kaun si vo basti hai
sau tarah rulati hai bhuul kar agar hansiye
roiye to ye duniya khilkhila ke hansti hai
kya zarur pi kar hi ham surur men aa.en
vo nazar salamat hai be-piye hi masti hai
jalva-ha-e-rang-o-bu dil men kya jagah paa.en
aankh men jo basta hai dil to us ki basti hai
dusre ke saghar par jo nazar nahin rakhte
un ki mai-parasti men shan-e-haq-parasti hai
kis ki mai-farosh ankhen bas ga.iin tasavvur men
be-niyaz jam-o-mai apni mai-parasti hai
dil unhen tarasta hai jab vo duur hote hain
jab qarib aate hain aankh unhen tarasti hai
ham ne ishq-o-ulfat men vo fareb khaa.e hain
jin ki dil-farebi ko zindagi tarasti hai
sadqe asman-jahi tere ḳhaksaron par
rashk-e-sad-bulandi hai ishq men jo pasti hai
be-sabat paata huun aksar un umidon ko
haa.e jin umidon par inhisar-e-hasti hai
jab zara ḳhayal aaya hosh ho ga.e ruḳhsat
ai ‘rishi’ un ankhon men kis bala ki masti hai
Leave a Reply