Sufi Tabassum
zindagi kya hai ik safar ke siva
ek dushvar rahguzar ke siva
kya mila tishna-e-mohabbat ko
ek mahrum si nazar ke siva
ishq ke dard ki dava kya hai
sab samajhte hain chara-gar ke siva
kuchh nahin gham-gusari-e-ahbab
ehtimam-e-gham-e-digar ke siva
kitni tanha thiin aql ki rahen
koi bhi tha na chara-gar ke siva
daulat-e-sajda ho saki na nasib
aur bhi dar the tere dar ke siva
kuchh nahin hai fusun-tarazi-e-husn
ishq ki shoḳhi-e-nazar ke siva
Leave a Reply