Rafia Shabnam Abidi
ek ik kar ke sabhi log bichhad jaate hain
dil ke jangal yunhi baste hain ujad jaate hain
kaise khush-rang huun khush-zaeqa phal huun lekin
vaqt par chakkhe nahin jaaen to sad jaate hain
apne lafzon ke taassur ka zara dhyan rahe
hakim-e-shahr kabhi log bhi ud jaate hain
ret tarikh ke siine men hatate hain vahi
aable pyasi zabanon men jo pad jaate hain
aise kuchh haath bhi hote hain ki jin ke kangan
todne vaale ke ehsas men gad jaate hain
‘shabnam’ andaz-e-takallum men kashish lazim hai
varna alfaz simatte hain sikad jaate hain
Leave a Reply