dil men kya kya havas-e-did badhai na gai
ru-ba-ru un ke magar aankh uthai na gai
ham raza-sheva hain tavil-e-sitam khud kar len
kya hua un se agar baat banai na gai
ye bhi adab-e-mohabbat ne gavara na kiya
un ki tasvir bhi ankhon se lagai na gai
aah vo aankh jo har samt rahi saiqa-pash
vo jo mujh se kisi unvan milai na gai
ham se puchha na gaya nam-o-nishan bhi un ka
justuju ki koi tamhid uthai na gai
dil ko tha hausla-e-arz-e-tamanna so unhen
sarguzisht-e-shab-e-hijran bhi sunai na gai
gham-e-duri ne kashakash to bahut ki lekin
yaad un ki dil-e-‘hasrat’ se bhulai na gai
Leave a Reply