Hama-Tan Gosh Ek Zamana Tha

hama-tan gosh ik zamāna thā

mere lab par tirā fasāna thā

kaash dil hī zarā Thahar jaatā

gardishoñ meñ agar zamāna thā

ham the aur e’timād-e-fasl-e-bahār

shāḳh shāḳh apnā āshiyāna thā

vo bahāreñ bhī ham pe guzrī haiñ

jab qafas thā na āshiyāna thā

dil kī ummidvāriyāñ na ga.iiñ

us karam kā koī Thikāna thā

sub.h se pahle bujh gayā ‘tābish’

ek dil hī charāġh-e-ḳhāna thā

Leave a Comment