Kabhi Jangal Kabhi Sahra Kabhi Dariya Likhkha

kabhī jañgal kabhī sahrā kabhī dariyā likhkhā

ab kahāñ yaad ki ham ne tujhe kyā kyā likhkhā

shahr bhī likkhā makāñ likkhā mohalla likhā

ham kahāñ ke the magar us ne kahāñ kā likhkhā

din ke māthe pe to sūraj hī likhā thā tū ne

raat kī palkoñ pe kis ne ye añdherā likhkhā

sun liyā hogā havāoñ meñ bikhar jaatā hai

is liye bachche ne kāġhaz pe gharauñdā likhkhā

kyā ḳhabar us ko lage kaisā ki ab ke ham ne

apne ik ḳhat meñ use dost purānā likhkhā

apne afsāne kī shohrat use manzūr na thī

us ne kirdār badal kar mirā qissa likhkhā

ham ne kab sher kahe ham se kahāñ sher hue

marsiya ek faqat apnī sadī kā likhkhā

Leave a Comment