kabhi jangal kabhi sahra kabhi dariya likhkha
ab kahan yaad ki ham ne tujhe kya kya likhkha
shahr bhi likkha makan likkha mohalla likha
ham kahan ke the magar us ne kahan ka likhkha
din ke mathe pe to suraj hi likha tha tu ne
raat ki palkon pe kis ne ye andhera likhkha
sun liya hoga havaon men bikhar jaata hai
is liye bachche ne kaghaz pe gharaunda likhkha
kya ḳhabar us ko lage kaisa ki ab ke ham ne
apne ik ḳhat men use dost purana likhkha
apne afsane ki shohrat use manzur na thi
us ne kirdar badal kar mira qissa likhkha
ham ne kab sher kahe ham se kahan sher hue
marsiya ek faqat apni sadi ka likhkha
Leave a Reply