zindagani ki haqiqat tab hi khulti hai miyan
kar-zar-e-zist ki jab nabz rukti hai miyan
roz ham ta.amir karte hain fasil-e-jism-o-jan
roz jism-o-jan se koi iinT girti hai miyan
ḳhvab se kah do hudud-e-chashm se bahar na ho
aankh se ojhal har ik ta.abir chubhti hai miyan
kal yahi chehre bahar-e-husn ki pahchan the
aaj un chehron se gard-e-umr uḌti hai miyan
ḳhvab hasrat ashk uljhan nala-o-faryad-o-gham
kisht-e-jan men roz fasl-e-dard ugti hai miyan
jhuuT hai jab ḳhvahish-e-nam-o-numud-o-taḳht-o-taj
jhuuT ki ḳhvahish men kyuun kar umr kaTti hai miyan
vasl ka darkar hain kuchh hijr ke lamhat bhi
vasl ki ḳhvahish men shiddat yuun hi baḌhti hai miyan
dekh kar ‘zakir’ gharib-e-shahr ki faqa-kashi
maut apne aap sau sau baar marti hai miyan
Leave a Reply