la-makan lag ashiqan ke ishq ka parvaz hai
asman aur arsh-o-kursi un ka pa-andaz hai
ik tafakkur un ka afzal az-ta.at-e-hafta-o-sal
sab ḳhala.iq par unhon ka is sabab e.azaz hai
aliman aur abidan ki bandagi sab qil-o-qal
ashiqan ke dil men raushan jo ki maḳhfi raaz hai
mutu-qabla-an-tamutu haal hai ushshaq ka
aliman ke gosh men us harf ka avaz hai
bul-havas ko sham.a se dil bandhna mumkin nahin
ashiqan ka is sabab zahid sada aghmaz hai
ḳhair o shar suun ashiqan be-dil nahin aur bujhte
ranj o rahat ishq men ma.ashuq ka sab naaz hai
Tal ga.e is ma.arke suun ka.i hazaran ai ‘alim’
jo raha so naam us ka ashiq-e-jan-baz hai
Leave a Reply