vaj.h-e-taskin-e-junun vasl-e-nigaran bhi nahin
ishq asan hai magar is qadar asan bhi nahin
har tajalli ke liye zarf-e-nazar hai darkar
jalva arzan hai magar is qadar arzan bhi nahin
jaane kya soch ke har raah men ruk jaata huun
us se milne ka kisi moḌ pe imkan bhi nahin
har nafas khinch raha hai koi rag rag se lahu
aur nashtar koi paivast-e-rag-e-jan bhi nahin
qafile hain ki guzarte hi chale jaate hain
manzilen hain ki kisi samt numayan bhi nahin
gul ka kya zikr ki ai dost mire daman par
ek muddat se kisi ḳhaar ka ehsan bhi nahin
kaun samjhega mire zarf-e-junun ki vus.at
main pareshan huun mira haal pareshan bhi nahin
tu ye ilzam mire zarf-e-junun par na tarash
ishq kafir bhi nahin ishq musalman bhi nahin
‘shor’ uTha duun main gul-o-lala ke parde lekin
yaan koi mahram-e-asrar-e-gulistan bhi nahin
Leave a Reply