aql ki sath se kuchh aur ubhar jaana tha
ishq ko manzil-e-pasti se guzar jaana tha
jalve the halqa-e-sar dam-e-nazar se bahar
main ne har jalve ko paband-e-nazar jaana tha
husn ka gham bhi hasin fikr hasin dard hasin
un ko har rang men har taur sanvar jaana tha
husn ne shauq ke hangame to dekhe the bahut
ishq ke dava-e-taqdis se Dar jaana tha
ye to kya kahiye chala tha main kahan se hamdam
mujh ko ye bhi na tha maalum kidhar jaana tha
husn aur ishq ko de tana-e-bedad ‘majaz’
tum ko to sirf isi baat par mar jaana tha