Sameena Gul
vo mujh ko mangta hai zeba.i chahta hai
mere ḳhilaf mujh se paspa.i chahta hai
hogi qubul lekin ye shart lazmi hai
maqbuliyat ki ḳhatir gahra.i chahta hai
sahra ki chhanta hai vo ḳhaak ḳhaak zarra
ik ajnabi sa gham hai rusva.i chahta hai
makr-o-fareb le kar har shaḳhs dekhta hai
dil sab se bhar gaya hai tanha.i chahta hai
dil dekhta raha hai us paar ka sitara
is paar dekhne ko bina.i chahta hai
bikhre hue paḌe hain reze vajud ke hi
simTe na phir kabhi ye harja.i chahta hai
is naḳhl-e-dostan pe gul hain khile hue jo
ḳhushbu-e-gulsitan ki sachcha.i chahta hai
Leave a Reply