Na Samjha Hun Na Samjhaya Gaya Hun

na samjhā huuñ na samjhāyā gayā huuñ

baḌī uljhan meñ uljhāyā gayā huuñ

sabab pūchho na merī tishnagī kā

ik-ik qatre ko tarsāyā gayā huuñ

mujhe jo dekhte ho is zamīñ par

falak se toḌ kar laayā gayā huuñ

kahāñ ab DhūñDte ho ḳhaak merī

havā ke saath hī aayā gayā huuñ

sazā.eñ mujh ko kaisī mil rahī haiñ

maiñ mujrim kis kā Thahrāyā gayā huuñ

shu.ūr aa.e kahāñ se mere andar

ġhalat jo raah dikhlāyā gayā huuñ

Leave a Comment