Syed Sarosh Asif
zamin aur asman hone se pahle
yahan kya tha jahan hone se pahle
yahan huun main vahan hone se pahle
kahan tha main yahan hone se pahle
tumhari be-ruḳhi ka lutf lenge
tumhare mehrban hone se pahle
amir-e-karvan banne ki zid hai
sharik-e-karvan hone se pahle
parindon par na taano us ko logo
ye Tahni hai kaman hone se pahle
chhupi thi duriyan nazdikiyon men
hamare darmiyan hone se pahle
namaz-e-ishq paḌhna hai zaruri
chale aao azaan hone se pahle
sada.en koi to sun le hamari
hamare be-zaban hone se pahle
main qatra kah ke us ko chheḌta tha
samundar ko javan hone se pahle
chhupe the zabt-e-gham ki vadiyon men
mire aansu ayaan hone se pahle
chhupa.en kis tarah se raaz apne
kisi ke razdan hone se pahle
Leave a Reply