vo tera mujh se kaha harf harf sach nikla
bhala main kaun tira harf harf sach nikla
kaha tha us ne mohabbat fareb hai dil ka
vo jab bhi duur gaya harf harf sach nikla
ana-parasti men apni misal aap tha vo
jo us ne chaha kiya harf harf sach nikla
nahin hai koi shikayat mujhe zamane se
mujhe tha jo bhi gila harf harf sach nikla
likhi thi us ne mohabbat ki be-qarari aur
vo jo bhi likh na saka harf harf sach nikla
nahin ho tum to aziyyat hai karobar-e-hayat
ye jhuuT tera piya harf harf sach nikla
Leave a Reply