Dard Dil Se Kabhi Juda Na Hua

dard dil se kabhi juda na hua

koi hamdard aap sa na hua

un ke hamrah tha tamam safar

tai magar phir bhi rasta na hua

ham bhanvar men the Dubte hi gae

nakhuda to kabhi khuda na hua

aap ka gham hai aap se behtar

vo kabhi ham se be-vafa na hua

hain sabhi log shahr ke achchhe

ham se badh kar koi bura na hua

ham se ruthi rahi ‘kiran’ lekin

dil to dil se kabhi juda na hua

Leave a Comment