Wahid Premi
aah ye daur ki jis men lab-o-ruḳhsar bike
dast-e-fitrat ke bana.e hue shahkar bike
dil ke jazbat bike zehn ke afkar bike
sach to ye hai ki har ik ahd men fankar bike
asr-e-hazir men koi chiiz bhi anmol nahin
ishq ki aan bike husn ka pindar bike
ik dahakti hui dozaḳh ko bujhane ke liye
kitne hi phuul se paikar sar-e-bazar bike
nafs ki devi ka pur-kaif ishara pa kar
sahib-e-hosh bike sahab-e-kirdar bike
ḳhud-gharaz chand nigahbanon ke hathon aksar
phuul to phuul hain gulzar ke gulzar bike
bazm-e-saqi bhi vo bazar-e-tarab hai ‘vahid’
ek saghar pe jahan fitrat-e-ḳhuddar bike
Leave a Reply