Makhmoor Saeedi
aa gaya ho na koi bhes badal kar dekho
do qadam saa.e ke hamrah bhi chal kar dekho
mehman raushniyo saḳht andhera hai yahan
paanv rakhna miri chaukhaT pe sambhal kar dekho
kabhi aisa na ho pahchan na paao ḳhud ko
baar baar apne irade na badal kar dekho
abr aa.ega tabhi pyaas bujhane pahle
reg-e-sahra ki tarah dhuup men jal kar dekho
din ki dekhi hui har shakl badal ja.egi
raat ke saath zara ghar se nikal kar dekho
mom ho ja.ega patthar sa ye dil siine men
lamha bhar ko kisi pahlu men pighal kar dekho
umr-e-rafta ko kahan DhunDh rahe ho ‘maḳhmur’
us ke kuche men milegi vahin chal kar dekho
Leave a Reply