naqd-e-dil-o-jan us ki ḳhatir rahn-e-jam karo
‘mir’ ke bada-e-gham-ḳhurda ko mai-ḳhvaron men aam karo
qashqa khincho dair men baiTho pairvi-e-asnam karo
kesh-e-barahman ko apnao jurm-e-vafa ko aam karo
ḳhvah koi bohtan tarasho ya aa.ed ilzam karo
tark-e-ta.alluq se pahle kuchh aur hamen bad-nam karo
saz-e-shikast-e-dil ki qimat kaun chukane aa.ega
giton ki dukan baḌhao naghmon ko nilam karo
ek ḳhayal-e-ḳham hai maana is ki tamanna is ka shauq
umr-e-ḳhizr mayassar ho to sirf ḳhayal-e-ḳham karo
nagri nagri phire musafir basti basti chhani ḳhaak
Tuk us zulf ke saa.e men bhi koi ghaḌi aram karo
jin ke dam se ghurbat men bhi bazm-e-tamanna raushan hai
pyaar un saari mah-vashon ko ‘ishqi’ nam-ba-nam karo
Leave a Reply