is daur ke asar ka jo puchho bayan nahin
hai kaun si zamin ki jahan asman nahin
is darja dilbaron se koi rasm-e-dilbari
dil haath par liye huun koi dil-sitan nahin
afsurda dil tha ab to hua gham se murda-dil
jiita huun dekhne men vale mujh men jaan nahin
adab sohbaton ka koi ham se siikh le
par kya karun ki talib-e-sohbat yahan nahin
dil jal ke bujh gaya hai kisi ne ḳhabar na li
ham soḳhta-dilon ka koi qadr-dan nahin
hai kal ki baat sab ke dilon men aziiz tha
par in dinon to ek bhi dil mehrban nahin
aisi hava bahi ki hai charon taraf fasad
juz saya-e-ḳhuda kahin dar-ul-aman nahin
aalam ki haigi nirḳh-e-ilahi se zindagi
tis par bhi dekhta huun ki bahuton ko naan nahin
‘hatim’ ḳhamosh lutf-e-suḳhan kuchh nahin raha
bakta abas phire hai koi nukta-dan nahin
Leave a Reply