tumhare dil men jo gham basa hai to main kahan huun
ye main nahin koi dusra hai to main kahan huun
hamari palkon ke ḳhvab aḳhir udaas kyuun hain
agar ye tum ko hi sochna hai to main kahan huun
vo meri tasvir meri ḳhushbu ḳhayal mera
tumhara kamra saja hua hai to main kahan huun
kisi ne dekha to kya kahega tum hi batao
tumhare hathon men a.ina hai to main kahan huun
tumhari chahat ke zaḳhm shayad mahak rahe hain
suna hai mausam hara-bhara hai to main kahan huun
hara jamega ki surḳh joḌa ye karchobi
tumhen ye dil hi se puchhna hai to main kahan huun
ye tum bhi socho ki ‘badr’ aḳhir udaas kyuun hai
charagh itna bujha bujha hai to main kahan huun
Leave a Reply