chhup nahin saktin kabhi siine men baten raaz ki
ik shikari si nazar hai mere tir-andaz ki
aaj kyon ahl-e-qafas se kar diya mujh ko juda
par katarvane the main ne is liye parvaz ki
yaad rakhna sham-e-mahfil ye mira zauq-e-sujud
aarzi hai umr tere naaz ki andaz ki
nik.hat-e-avara qaa.em tujh se hai bazm-e-chaman
teri ḳhamoshi sada hai saz-e-be-avaz ki
ham samajh kar bhi na samjhe apne charagar ki baat
pyaar tha ya mehrbani thi nigah-e-naz ki
bul-havas nazron ko piiri men hai itna hi malal
uḌ na sakne se jo halat hoti hai ik baaz ki
ik shua si dekhta huun bujh rahi sham.a men
hai bina anjam men bhi ik na.e aghaz ki
uḌ gaya jaate hi us se husn ka dilkash nikhar
aa.ine men bas ga.i surat tire e.ajaz ki
Leave a Reply