Hai Mashq-E-Sukhan Jari Chakki Ki Mashaqqat Bhi

hai mashq-e-sukhan jaari chakki ki mashaqqat bhi

ik turfa tamasha hai ‘hasrat’ ki tabiat bhi

jo chaho saza de lo tum aur bhi khul khelo

par ham se qasam le lo ki ho jo shikayat bhi

dushvar hai rindon par inkar-e-karam yaksar

ai saqi-e-jan-parvar kuchh lutf-o-inayat bhi

dil bas-ki hai divana us husn-e-gulabi ka

rangin hai usi ru se shayad gham-e-furqat bhi

khud ishq ki gustakhi sab tujh ko sikha degi

ai husn-e-haya-parvar shokhi bhi shararat bhi

barsat ke aate hi tauba na rahi baaqi

badal jo nazar aae badli meri niyat bhi

ushshaq ke dil nazuk us shokh ki khu nazuk

nazuk isi nisbat se hai kar-e-mohabbat bhi

rakhte hain mire dil par kyuun tohmat-e-betabi

yaan nala-e-muztar ki jab mujh men ho quvvat bhi

ai shauq ki bebaki vo kya teri khvahish thi

jis par unhen ghussa hai inkar bhi hairat bhi

har-chand hai dil shaida hurriyat-e-kamil ka

manzur-e-dua lekin hai qaid-e-mohabbat bhi

hain ‘shad’ o ‘safi’ shair ya ‘shauq’ o ‘vafa’ ‘hasrat’

phir ‘zamin’ o ‘mahshar’ hain ‘iqbal’ bhi ‘vahshat’ bhi

Leave a Comment