Mehboob Rahi
kya koi ganj-e-giran-maya chhupa hai mujh men
khojne vaale tu kya khoj raha hai mujh men
main to ḳhamosh huun halat ki saffaki par
jaane phir kaun hai jo chiḳh raha hai mujh men
jis se ho paa.i na ta-hal shanasa.i miri
log kahte hain ki ik zehn-e-rasa hai mujh men
phir masa.il ke yazid aa.e hain bai’at lene
garm phir ma.arka-e-karb-o-bala hai mujh men
dosto mujh ko khangaloge kahan tak aḳhir
ma-siva-karb bhala dusra kya hai mujh men
na koi dard na ehsas na jazba na umang
ye bhi ‘rahi’ koi jiine ki ada hai mujh men
Leave a Reply