Rahman Hafeez
chilla rahi hain jis pe zabanen lahu lagi
ye vo sada thi jo mujhe bar-e-gulo lagi
kya kya na miss kiya tujhe main ne firaq men
lekin tiri kami jo tire ru-ba-ru lagi
main tab qarar dunga tujhe apna ham-suḳhan
jab meri ḳhamushi bhi tujhe guftugu lagi
ab ghir ke rah gaya huun ajab azhdaham men
har aarzu key pusht se hai aarzu lagi
ai hasrat-e-kamal kuchh apna ḳhayal kar
mar hi na jaa.e yuun mire siine se to lagi
badnam ho ga.e hain jise likh ke aaj ham
kal dekhiyega film yahi ku-ba-ku lagi
bardasht ka azaab miri ḳhamushi se puchh
topen sadaon ki hain mire chaar su lagi
Leave a Reply