Aakhiri Raat

chand tuuta pighal gae taare

qatra qatra tapak rahi hai raat

palken ankhon pe jhukti aati hain

ankhdiyon men khatak rahi hai raat

aaj chhedo na koi afsana

aaj ki raat ham ko sone do

khulte jaate hain simte-sukde jaal

ghulte jaate hain khuun men badal

apne gulnar pankh phailae

aa rahe hain isi taraf jangal

gul karo shama, rakh do paimana

aaj ki raat ham ko sone do

shaam se pahle mar chuka tha shahr

kaun darvaza khatkhatata hai

aur unchi karo ye divaren

shor angan men aaya jaata hai

kah do hai aaj band mai-khana

aaj ki raat ham ko sone do

jism hi jism hain, kafan hi kafan

baat sunte na sar jhukate hain

amn ki khair, kotval ki khair

murde qabron se nikle aate hain

koi apna na koi begana

aaj ki raat ham ko sone do

koi kahta thaa, thiik kahta tha

sar-kashi ban gai hai sab ka shiar

qatl par jin ko e’tiraz na tha

dafn hone ko kyuun nahin tayyar

hosh-mandi hai aaj so jaana

aaj ki raat ham ko sone do

Leave a Comment