vo ek shaḳhs jo mahfil men bolta tha bahut
suna hai ahl-e-nazar se vo khokhla tha bahut
rida-e-shab se lipaT ke savad-e-sham ke baad
kisi ke baare men pahron main sochta tha bahut
abhi jo paas se nazren chura ke guzra hai
ga.i ruton men vahi mujh ko chahta tha bahut
us ajnabi ne bil-aḳhir palaT ke dekh liya
tilismi shahar men koi pukarta tha bahut
jo baat baat pe hansta tha muskurata tha
kise ḳhabar ki vahi dil men ro raha tha bahut
kuchh aise ahl-e-junun bhi yahan se guzre the
ghubar-e-rah-e-vafa jin ko DhunDhta tha bahut
jo puchhte ho mujhe tum ko yaad ho shayad
koi nazar se tumhari kabhi gira tha bahut
Leave a Reply