mayassar ḳhud nigah-dari ki asa.ish nahin rahti
mohabbat men to pesh-o-pas ki gunja.ish nahin rahti
andhere aur bhi kuchh tez-raftari se baḌhte hain
diya koi jalane ki jahan koshish nahin rahti
ye dil to kis taraf jaane baha kar le gaya hota
nigahon men agar vo sa.at-e-pursish nahin rahti
mah-o-anjum se lauT aa.en ijara-dar duniya ke
jahan ye paanv rakhte hain vahan tabish nahin rahti
bahut se phuul lahje ḳhaar hote ham ne dekhe hain
kisi shirin-nava ki dil ko ab ḳhvahish nahin rahti
musallas ka ḳhat-e-salis mujhe mil kar nahin deta
kabhi qismat se vo ruk jaa.e to barish nahin rahti
Leave a Reply