Idris Babar
is se pahle ki zamin-zad shararat kar jaa.en
ham sitaron ne ye socha hai ki hijrat kar jaa.en
daulat-e-ḳhvab hamare jo kisi kaam na aa.i
ab kisi ko nahin milne ki vasiyyat kar jaa.en
dahr se ham yunhi be-kar chale jaate the
phir ye socha ki chalo ek mohabbat kar jaa.en
ik zara vaqt mayassar ho to aa kar mire dost
dil men khilte hue phulon ko nasihat kar jaa.en
un hava-ḳhvahon se kahna ki zara shaam Dhale
aa.en aur bazm-e-charaghan ki sadarat kar jaa.en
dil ki ik ek ḳharabi ka sabab jante hain
phir bhi mumkin hai ki ham tum se muravvat kar jaa.en
shahr ke ba.ad to sahra tha miyan ḳhair hui
dasht ke paar bhala kya hai ki vahshat kar jaa.en
reg-e-dil men ka.i nadida parinde bhi hain dafn
sochte honge ki dariya ki ziyarat kar jaa.en
Leave a Reply