samne ho kar bhi kab sab par ayaan hote hain log
jo nazar aate hain vaise hi kahan hote hain log
chhap se mahaul ki bachna bahut dushvar hai
apne gird-o-pesh hi ke tarjuman hote hain log
pastiyon men bhi nazar aate hain azmat ke nishan
ḳhaak par rahte hue bhi asman hote hain log
qafila salar jab hote hain uf vo sa.aten
haa.e vo lamha ki jab be-karvan hote hain log
zulm par bandhen kamar to al-aman-o-al-hafiz
misl-e-changez ik bala-e-be-aman hote hain log
mehrban ho jaa.en to ranj-o-alam ki dhuup men
peḌ ki surat ghanera sa.eban hote hain log
naqsh-e-pa tak bhi nahin milte kahin un ke ‘na.im’
dekhte hi dekhte yuun be-nishan hote hain log
Leave a Reply