Jahan Dekho Wahan Maujud Mera Kirshn Pyara Hai

jahan dekho vahan maujud mera kirshn pyara hai

usi ka sab hai jalva jo jahan men ashkara hai

bhala makhluq khaliq ki sifat samjhe kahan qudrat

usi se neti neti ai yaar didon ne pukara hai

na kuchh chara chala lachar charon haar kar baithe

bichare bed ne pyare bahut tum ko bechara hai

jo kuchh kahte hain ham yahi bhi tira jalva hai ik varna

kise taqat jo munh khole yahan har shakhs haara hai

tira dam bharte hain hindu agar naqus bajta hai

tujhe bhi shaikh ne pyare azaan de kar pukara hai

jo but patthar hain to kaabe men kya juz-khak-o-patthar hain

bahut bhula hai vo is farq men sar jis ne maara hai

na hote jalva-gar tum to ye girja kab ka gir jaata

nasara ko bhi to akhir tumhara hi sahara hai

tumhara nuur hai har shai men kah so koi tak pyare

usi se kah ke har har tum ko hindu ne pukara hai

gunah bakhsho rasai do ‘rasa’ ko apne qadmon tak

bura hai ya bhala hai jaisa hai pyare tumhara hai

Leave a Comment