Shafiq Saleemi
baja ki har koi apni hi ahmiyat chahe
magar vo shaḳhs to ham se musahibat chahe
guzar rahe hain ajab jan-kani men roz-o-shab
ki ruuh qarya-e-tan se muhajrat chahe
kaman men tiir chaḌha ho to be-aman taa.ir
salamti ko koi kunj-e-afiyat chahe
nikal paḌe hain gharon se to sochna kaisa
ab aa.e rah men azabon ki saltanat chahe
ana ke hathon hua hai ‘shafiq’ jo bhi hua
magar ye dil ki abhi tak mufahamat chahe
Leave a Reply