Manmohan Talkh
zikr hai dard ka ik shahr basa hai mujh se
ab ye jaana ki mera dard baḌa hai mujh se
bahut ehsan hai jo koi bhi mila hai mujh se
shahr ka shahr magar jaise ḳhafa hai mujh se
bar-ha ḳhud pe main hairan bahut hota huun
koi hai mujh men jo bilkul hi juda hai mujh se
kaT se jaate hain sabhi koi nahin kuchh kahta
kaun sa jaane qusur aisa hua hai mujh se
munh pe kahne to lage hain miri basti vaale
baat karne ka chalan kuchh to chala hai mujh se
baat karte hue ḳhud se jo guzarta hai koi
mujh ko lagta hai ye kuchh us ne kaha hai mujh se
abhi lauT aa.ega miri hi tarah kuḌhta sa
mere hi ghar ka pata puchh gaya hai mujh se
main ne ye sab se kaha tum to kahin ke na rahe
aur dekho ki yahi sab ne kaha hai mujh se
hai koi mujh sa kahun kya na main janun na kuchh aur
aur mera hi pata puchh raha hai mujh se
‘talḳh’ jaata hi nahin dukh ke nagar kahta hai
hai vahan jo bhi vo mil kar hi gaya hai mujh se
Leave a Reply