aap apni naqab hai pyare
ye bhi koi hijab hai pyare
naqsh-bar-ru-e-ab hai pyare
zindagi ik habab hai pyare
le ke chal shaiḳh daftar-e-taqva
aaj roz-e-hisab hai pyare
tera husn-o-jamal kya kahna
mahtab aftab hai pyare
kaun jaata hai dil men aa aa kar
har sukun iztirab hai pyare
husn taqva-shikan sahi lekin
ishq ḳhana-ḳharab hai pyare
ik sarapa surur-o-bad-masti
aankh kya hai sharab hai pyare
mere zauq-e-nazar ki rusva.i
kis ḳhata ka itaab hai pyare
is qadar bhi na ‘taj’ itrana
chaar din ka shabab hai pyare
Leave a Reply