Dini Hain Sab Koi Raati Nahin Hai

Farhat Ehsas

dini hain sab koi raati nahin hai

andheron ka koi sathi nahin hai

to kya be-ḳhvab hi rah ja.unga main

mujhe to niind hi aati nahin hai

ki har bimar un ankhon se dava paa.e

shifa-ḳhana ye ḳhairati nahin hai

laga hai kitna sarmaya zaban ka

ye kar-e-sha.iri zaati nahin hai

tarashi ja chuki ummid ki lau

diya jalta hua baati nahin hai

sada jaati to hai us ki gali men

vahan se le ke kuchh aati nahin hai

akele paḌ ga.e ham karvan men

ki ab ke vo mira sathi nahin hai

lage hain saare sazinde badan ke

magar ye ruuh naghmati nahin hai

rahega be-badan hi ‘farhat-ehsas’

hava par koi deh aati nahin hai