raat ke vaqt koi giit sunati hai hava
shaḳh-dar-shaḳh bhala kis ko bulati hai hava
sard raat apni nahin kaTti kabhi tere baghair
aise mausam men to aur aag lagati hai hava
ek manus si ḳhushbu se mahakti hai faza
jab tu aata hai bahut shor machati hai hava
kin guzargahon ke hain gard-o-ghubar ankhon men
roz patjhaḌ ke hamen ḳhvab dikhati hai hava
zindagi jalta hua ek diya hai ‘anjum’
dekhna ye hai kahan ja ke bujhati hai hava
Leave a Reply