Na Kuredun Ishq Ke Raaz Ko Mujhe Ehtiyat-E-Kalam Hai

Siraj Lakhnavi

na kuredun ishq ke raaz ko mujhe ehtiyat-e-kalam hai

mira zauq itna buland hai jahan aarzu bhi haram hai

faqat ek rishta-e-mushtarak ḳhalish-e-sukut-e-kalam hai

yunhi ik zamana guzar gaya na payam hai na salam hai

jo charagh-e-ashk nasib the vahi sabr kar ke jala diye

vahi kafirana siyahiyan ye vahi bujhi hui shaam hai

abhi rakkha rahne do taaq par yunhi aftab ka aa.ina

ki abhi to meri nigah men vahi mera mah-e-tamam hai

mira har nafas miri har nazar hai raza-e-ghair pe munhasir

jo isi ka naam hayat hai to hayat marg-e-davam hai

yahi mai-kada ka ḳhulasa hai yahi mastiyon ka nichoḌ bhi

tiri chashm-e-bada-farosh men ye jo ek kaif-e-tamam hai

miri hasraton ka na ḳhuun kar nahin yuun na rok miri zaban

miri sard aah pe shak na kar ye to mera husn-e-kalam hai

baḌi dil-ḳharash sada thi vo ki bina-e-mai-kada hil ga.i

ye shikast-e-tauba hai dekhta ki shikasta-e-shisha-o-jam hai

hai vahi fareb-e-dil-o-nazar abhi karobar-e-hayat men

vahi ek laghzish-e-ḳhuld hai jo yahan bhi gam-ba-gam hai

zara dekhna to azaan ka bhi ‘siraj’ vaqt nahin raha

ye tulu-e-mahr hai ya vahi kaf-e-gul-farosh pe jaam hai