mujh se pahle tujhe jis shakhs ne chaha us ne
shayad ab bhi tira gham dil se laga rakkha ho
ek be-nam si ummid pe ab bhi shayad
apne khvabon ke jaziron ko saja rakkha ho
main ne maana ki vo begana-e-paiman-e-vafa
kho chuka hai jo kisi aur ki raanai men
shayad ab laut ke aae na tiri mahfil men
aur koi dukh na rulae tujhe tanhai men
main ne maana ki shab o roz ke hangamon men
vaqt har gham ko bhula deta hai rafta rafta
chahe ummid ki shamen hon ki yadon ke charagh
mustaqil boad bujha deta hai rafta rafta
phir bhi maazi ka khayal aata hai gahe-gahe
muddaten dard ki lau kam to nahin kar saktin
zakhm bhar jaaen magar daagh to rah jaata hai
duriyon se kabhi yaden to nahin mar saktin
ye bhi mumkin hai ki ik din vo pashiman ho kar
tere paas aae zamane se kinara kar le
tu ki maasum bhi hai zud-faramosh bhi hai
us ki paiman-shikani ko bhi gavara kar le
aur main jis ne tujhe apna masiha samjha
ek zakhm aur bhi pahle ki tarah sah jaun
jis pe pahle bhi kai ahd-e-vafa tuute hain
isi do-rahe pe chup-chap khada rah jaun