Jazib Quraishi
shikasta aks tha vo ya ghubar-e-sahra tha
vo main nahin tha jo ḳhud apne ghar men rahta tha
ajiib shart-e-safar thi mire liye ki mujhe
siyah dhuup men raushan charagh rakhna tha
fasil-e-sang se mujh ko utarne aaya
vo ik sitara jo main ne kabhi na dekha tha
na jaane kaun se mausam men ji raha tha main
ki meri pyaas thi meri na mera dariya tha
shajar ki chhanv se bahar hai rizq taa.ir ka
vo sahilon pe na Thahra kabhi jo pyasa tha
kise pukar raha tha mira adhura-pan
main garm ret pe taaza gulab rakhta tha
hazar kam-suḳhani darmiyan rahi phir bhi
vo mujh se aan mila tha to rang barsa tha
main bujh gaya to mire jism-o-jan khule mujh par
charagh aur tha koi jo mujh men jalta tha
vo apne ghar men ujala na kar saka ‘jazib’
tamam raat jo suraj ke ḳhvab rakhta tha
Leave a Reply