ho gaya huun har taraf bad-nam tere shahr men
ye mila hai pyaar ka in.aam tere shahr men
jab sunahri chuḌiyan bajti hain dil ke saaz par
nachti hai gardish-e-ayyam tere shahr men
is qadar pabandiyan aḳhir ye kya andher hai
le nahin sakte tira hi naam tere shahr men
ab to yadon ke ufuq par chand ban kar muskura
rote rote ho ga.i hai shaam tere shahr men
kab khulega tere mai-ḳhane ka dar mere liye
phir raha huun le ke ḳhali jaam tere shahr men
ek divane ne kar li ḳhud-kushi pichhle pahar
aa gaya aḳhir use aram tere shahr men
‘prem’ yusuf to nahin lekin ba-andaz-e-digar
ho chuka hai bar-ha nilam tere shahr men
Leave a Reply