na falak hoga na ye kucha-e-qatil hoga
mire kahne men kisi din jo mira dil hoga
jab numayan vo savar-e-rah-e-manzil hoga
na to main aap men hunga na mira dil hoga
aadhi raat aa ga.i bas bas dil-e-betab sambhal
ham samajhte hain jo is karb ka hasil hoga
ruḳhsat ai vahshat-e-tanha.i-o-ghurbat ruḳhsat
ḳhauf hi kya hai jo hamrah mire dil hoga
raat ka ḳhvab nahin jis ki har ik de ta.abir
ye vo arman hai puura jo ba-mushkil hoga
tera kya zikr hai zindan ki hilegi divar
nala-kash jab koi paband-e-salasil hoga
Taal diin main ne ye kah kah ke ziden bachpan ki
aa.ina bhi koi shai hai jo muqabil hoga
Dubne ja.ega shayad koi mayus visal
majma-e-am suna hai lab-e-sahil hoga
chaud.hvan saal use deta hai muzhda ‘alim’
le mubarak ho ki ab tu mah-e-kamil hoga
Leave a Reply