kashkol hai to la idhar aa kar laga sada
main pyaas banTta huun zarurat nahin to ja
main shahr shahr ḳhvabon ki gaThri liye phira
be-dam tha ye maal pe gahak koi na tha
patthar pighal ke ret ke manind narm hai
dard itni der saath raha raas aa gaya
sinon men iztirab hai girya hava men hai
kya vaqt hai ki shor macha hai dua dua
himmat hai to buland kar avaz ka alam
chup baiThne se hal nahin hone ka mas.ala
vaan shab-gazida sinon ko suraj ata hue
tum bhi vahan ga.e the ‘ziya’ tum ko kya mila
Leave a Reply