Kashkol Hai to La Idhar Aa Kar Laga Sada

kashkol hai to lā idhar aa kar lagā sadā

maiñ pyaas bāñTtā huuñ zarūrat nahīñ to jā

maiñ shahr shahr ḳhvāboñ kī gaThrī liye phirā

be-dām thā ye maal pe gāhak koī na thā

patthar pighal ke ret ke mānind narm hai

dard itnī der saath rahā raas aa gayā

sīnoñ meñ iztirāb hai girya havā meñ hai

kyā vaqt hai ki shor machā hai duā duā

himmat hai to buland kar āvāz kā alam

chup baiThne se hal nahīñ hone kā mas.ala

vaañ shab-gazīda sīnoñ ko sūraj atā hue

tum bhī vahāñ ga.e the ‘ziyā’ tum ko kyā milā

Leave a Comment