bayan kya kijiye soz-e-darun ko dastanon men
nikal ke tiir kab aate hain vapas phir kamanon men
hamari soch ke badal hain uḌte asmanon men
karegi yaad ye duniya hamen aate zamanon men
sabhi mil kar bichhaḌ jaa.en agar gumnam ho jaa.en
makin phir kis liye baste hain in unche makanon men
rahe vahshat-zada ke saath to vahshat mili har dam
vo hi vahshat rahi man men sabhi mausam suhanon men
chura ke ḳhvab vo mere chala to ye ḳhayal aaya
qalam ki nok se likh duun alam ye sab lisanon men
jo sach kahte hain vo hi javedan rahte hain aalam men
chhupaya ja nahin sakta haqiqat ko fasanon men
zamin sarsabz hai faslen bhi kaisi lahlahati hain
amir-e-shahr ne ḳhirman jo banTa hai kisanon men
vafa ke naam par hargiz hina ḳhamosh mat rahna
kabhi vo lauT a.enge tumhari dastanon men
Leave a Reply