Sabeela Inam Siddiqui
kis ko batate kis se chhupate suragh-e-dil
chup saadh li hai zaḳhm dikhaya na dagh-e-dil
kaise karen bayan gham-e-jan ki dastan
ai kaash gul khila.e hamara ye bagh-e-dil
guzre hamari ziist ke ayyam is tarah
labrez ansuon se hai goya ayagh-e-dil
jab raakh ban ga.e to kaha ye harif ne
jal jal ke vo jalate rahe hain charagh-e-dil
jis se mile tavil zamana guzar gaya
shayad usi ke zehn men ho kuchh suragh-e-dil
chahat ki ab to koi bhi hasrat nahin rahi
sarsabz us ki yaad se phir bhi hai bagh-e-dil
rakhti nahin ‘sabila’ kabhi aib par nazar
masruf pyaar men raha is ka faragh-e-dil
Leave a Reply