ruḳh pe yuun jhuum kar vo laT jaa.e
ḳhizr dekhe to umr kaT jaa.e
us nazare se kya bache koi
jo nigahon se ḳhud lipaT jaa.e
ye bhi andher ham ne dekha hai
raat ik zulf men simaT jaa.e
jaane tujh se udhar bhi kya kuchh hai
kaash tu samne se haT jaa.e
maut ne khel ham ko jaana hai
kabhi aa.e kabhi palaT jaa.e
Dubne tak men na-umid nahin
kab na jaane hava palaT jaa.e
raat guzre na dard-e-dil Thahre
kuchh to baḌh jaa.e kuchh to ghaT jaa.e
un se kah kar bhi dekh len gham-e-dil
‘saif’ ye kaam bhi nipaT jaa.e
Leave a Reply