saza hai kis ke liye aur jaza hai kis ke liye
pata nahin dar-e-zindan khula hai kis ke liye
surahi-e-mai-e-nab-o-safina-ha-e-ghazal
ye harf-e-husn-e-muqaddar likha hai kis ke liye
faqat shunid hai ab tak jo diid ho to bataen
bahar-e-sabza-o-raqs-e-saba hai kis ke liye
nahin jo apne liye bavajud zauq-e-nazar
sahifa-e-ruḳh-o-rang-e-hina hai kis ke liye
miTa sake na agar tishna-kamiyan meri
kaho ki ḳhubi-e-ab-o-hava hai kis ke liye
tumhen nahin ho agar aaj gosh-bar-avaz
ye meri fikr ye meri nava hai kis ke liye
ye ik saval hai shikva nahin gila bhi nahin
mire ḳhuda tira lutf-o-ata hai kis ke liye
Leave a Reply