Cleopatra

Akhtar Ul Iman

shaam ke daman men pechan nim-afrangi hasin

nuqrai paron men ik sone ki laag

rah guzar men ya khiraman sard aag

ya kisi mutrib ki le ik tishna takmil raag

ek bahr-e-be-karan ki jhilmilati sath par

zau-fagan afsana-ha-e-rang-o-nur

niile niile do kanval maujon se chuur

bahte bahte jo nikal jaaen kahin sahil se duur

chand si peshaniyon par zarfishan lahron ka jaal

ahmarin udta hua rang-e-sharab

jam gai hain asha-e-sad-aftab

gardanon ke pech-o-kham men ghul gaya hai mahtab

ishrat-e-parvez men kya nala-e-ha-e-tez-tez

ud gaya din ki javani ka khumar

shaam ke chehre pe laut aaya nikhar

ho chuke hain ho rahe hain aur daman dagh-dar

us ka zarrin takht simin jism hai ankhon se duur

jam-e-zahr-alud se uthte hain jhaag

chaunk kar angdaiyan lete hain naag

jaag ‘antoni’ mohabbat so rahi hai jaag jaag