har sitam lutf hai dil ḳhugar-e-azar kahan
sach kaha tum ne mujhe gham se sarokar kahan
dasht-o-sahra ke kuchh adab hua karte hain
kyuun bhaTakte ho yahan saya-e-divar kahan
bada-e-shauq se labrez hai saghar mera
kaise azkar mujhe fursat-e-afkar kahan
kyuun tire daur men mahrum-e-saza huun ki mujhe
jurm par naaz sahi jurm se inkar kahan
rah-rav-e-shauq hai begana-e-manzil varna
kucha-e-dar kahan kucha-e-dildar kahan
sochte kya ho jalate raho zaḳhmon ke charagh
dekhte kya ho abhi sub.h ke asar kahan
tum ko chaha tha magar tum bhi vafa-dost nahin
dil pe takiya tha magar dil bhi vafadar kahan
yuun to har gaam pe gham-ḳhvar mile hain ‘taban’
jo mire gham ko samajh paa.e vo gham-ḳhvar kahan
Leave a Reply